Grace Maria Afonso hanesan membro atual TLYfP no Grace comesa join ho TLYfP iha tinan 2014. Agora dadaun estudante iha UNTL-Faculdade Engenharia de Geologia e Petróleo
"Hau sente orgullu tebes ho jovem timoroan ne’ebe ho inisiativa rasik no ho korajem hakarak harii no envolve aan iha grupo ou organizasaun ne’ebe fo impaktu pozitivu ba iha sosiedade no mos ba nasaun. Ezemplu ida husi organizasoens hirak ne’e maka TLYfP, ne’ebe kria husi jovem sira ne’ebe iha hanoin atu kontribui ba dezenvolvimentu Timor Lorosa’e ninian, liuhusi atividades konkretu ne’ebe halao ona hanesan; Mini Initiative for Peace Conference, TLYfP Cup, Selebrasaun Loron Mundial Dame, Fund Rising, Servisu Sosial no Komunitarius hanesan limpeza jeral, kolekta osan no sasan hodi ajuda ema mukit, selebra Natal hamutuk ho oan kiak sira, realiza planu aksaun iha area edukasaun, saude, sosial, no ambiental ninian no seluk-seluk tan. Atividades hirak ne’e hotu halao ona ho diak, husi jovem sira ne’ebe dedika nia aan no tempu hodi tau hamutuk ideias no realiza.
Ita hotu hatene katak jovem maka sai hanesan fundasaun ba rai ida nian. Sai jovem laos deit atu goza nia direitu, maibe tenke kumpri nia dever, laos ezize deit maibe kontribui mos, hodi nune’e bele muda ita nia mentalidade jovem timoroan nian atu sai jovem ne’ebe kreativu, inovativu no konstrutivu. No liu husi atividades hirak ne’e mos bele kapasita no forma jovem sira atu nune’e bele sai individu ne’ebe kualifikadu iha future.
Tanba ne’e hau mos nuudar jovem ida bolu hau nia maluk joventude timoroan sira atu ho espiritu nasionalismu bele iha hanoin atu kontribui ba dezenvolvimentu rai doben Timor Lorosa’e nian. Maske Timor nasaun foun maibe neneik neneik sei sai nabilan ba mundu tomak iha futuru tanba nia oan sira ne’ebe hadomi nia."
0 komentar:
Posting Komentar